La Genesi

Giovanni De Santis è portavoce, con i suoi testi scritti musicati e cantati, della cultura popolare e della lingua grica del territorio. Alla vena poetica ereditata dal padre Cesare unisce la forte passione teatrale e musicale. È socio fondatore e presidente del gruppo Avleddha che dal 1991 lavora per la diffusione del patrimonio culturale espressione della Grecìa Salentina.

PREMESSA

A ccì no’ mme canùsce, no’ llu nnegu,
volìa lli dau de mie doi chiarimenti
(a cci me sape, è inutile ca spiegu…):
cu no’ sse crìscia, a vote, gnenti gnenti,
ca su’ senza princìpi e me ne fregu
de ci è devòtu a fede e sacramenti!

Su’ llargu te vitùte e de rispettu
e se me spingu è curpa de la Musa
ca me ipnotizza a vote, e su’ costrettu
cu scrivu qualche ccosa licenziùsa…
Quandu me trovu sutta a quist’effettu,
è quiddha ca cumànda, dispettusa!

È comu quandu tie vai caminàndu,
distrattamente su nnu marciapiede:
succede, ca alli cani, a quandu a quandu,
li scappa… e tie la stompi cu llu piede!
Unu te dice: «La stompàsti? E scosta…»
Ma tie, non è ca l’hai stompàta ampòsta!

Tie dici: vau ppassèggiu, ca me nnòju…
O dici: mo’ me scrivu na poisìa…
Ci mai pote penzàre ca pe’ ’mbròju
vai cu tte stompi qualche porcarìa!
Cusì, quandu vai scrivi e mutu penzi:
o dai manu alla Musa, o scrivi gnenzi!

E quiddha certe vote è esagerata,
ca dae de fantasìa, nci minte impegnu…
Prumèttu ca se ccappa n’addha fiata
no’ scrivu pròpiu gnenzi: me ritègnu!
Piuttòstu vau ppasseggiu e mintu accùra
A dhu vau mpòggiu la caminatùra!

Comunque, se quarcùnu s’ave ’ntìsu
ca intru sti versi àvene peccati:
no’ ppenzu ca me ’mmeritàva ccisu!
Anzi, me spettu ca me perdunàti…
In fondu, se cunfèssu: «Aggiu sbajàtu!»;
no’ llava, ci cunfèssa, ogni ppeccàtu?

…Armènu… cusì dice, se la sai…
Poi, lu peccatu, allu cunfessiunàle,
rumàne circoscrittu, e spiccia addhài;
li mei, ’nvece, li misi allu giornale…
Ca se febbràru li cuntava tutti,
facìa ’quàja lu vinu intru lle vutti!